Monday, January 6, 2014

భోగి జనవరి 13, సంక్రాంతి 14, కనుమ 15 శాస్త్రీయం

జనవరి భోగి 13, సంక్రాంతి 14, కనుమ 15


ఆంధ్రప్రదేశ్ రాష్ట్ర దృగ్గణిత పంచాంగ కర్తలందరూ జనవరి 13 భోగి పండుగను, 14 సంక్రాంతి పండుగగా నిర్ణయం గణితం ప్రకారం చేస్తూ తిరుమల తిరుపతి దేవస్థాన ఈ.ఒ గారికి కూడా తెలియచేసి ఇదే తేదిలలోనే పర్వదినాన్ని టి.టి.డి ఆచరించి భక్తులకు ఎటువంటి సందేహాలు లేకుండా చేయాలని దృగ్గణిత పంచాంగకర్తలు కోరబోతున్నారు.

Saturday, January 4, 2014

జనవరి 14 మంగళవారం నాడే మకరసంక్రాంతి పర్వదినం, 15న కాదు

ఈ 2014 జనవరిలో మకరసంక్రాంతి పర్వదినం 14వ తేదిన లేక 15వ తేదిన అనే సందేహాలు చాలామందికి రావటంచే నాకు ఉత్తరాలు వ్రాయటం జరిగింది. వారందరికీ పూర్తి వివరాలను తెలియచేస్తున్నాను. 
ఖగోళంలో సూర్యగ్రహం మకరరాశి ప్రవేశం జరిగినరోజే మకర సంక్రాంతి పర్వదినాన్ని ఆచరిస్తారు. 14వ తేది మధ్యాహ్నం 1గం.14 నిముషాలకి మకర సంక్రమణం జరుగుతుంది. అందుచే మకరసంక్రాంతి పర్వదినాన్ని 14వ తేది మంగళవారం నాడే ఆచరించాలి. ఇదే సమయాన్ని ఖగోళ నక్షత్రశాలలు మరియు అమెరికాలోని నాసా వారు కూడా ధృవీకరిస్తున్నారు.ఈ విధంగా ఖచ్చిత సమాచారంతో వైజ్ఞానిక శాస్త్ర నిర్ణయాలతో  ఏకీభవించే పంచాంగాలను దృగ్గణిత పంచాంగాలు అంటారు.

వైజ్ఞానిక శాస్త్ర సమాచారాన్ని విభేదిస్తూ చెప్పే పంచాగాలను పూర్వగణిత పంచాంగాలు అంటారు. ఈ పూర్వగణితంతో  చేసే పంచాంగాలలో కొన్ని మాత్రం 14వ తేది కాక 15వ తేదీగా ప్రకటించాయి. కాని వీరి గణితాలు వైజ్ఞానిక శాస్త్ర సమయలతో ఏకీభవించవు. కొంతమంది పూర్వగణిత పంచాంగ కర్తలు, తాము రచించే గణితం పూర్వగణితమైనప్పటికీ , పండుగ మాత్రం 14వ తేదీనే ప్రకటించారు. అయితే పశ్చిమ గోదావరి జిల్లాలో కొంతమంది పంచాంగ కర్తలు 2 తేదీలను ఇవ్వటం జరిగింది. అదెలాగంటే వారిచే రచింపబడిన ఒక పంచాంగంలో 14వ తేదిగాను, అదే రచయితతో వచ్చే మరో కేలండర్లో మరియు ఇంకో పంచాంగంలో 15 వ తేది ప్రకటించారు. అనగా రచయిత ఒక్కరే. కానీ తేదీలు మాత్రం రెండు రకాలు. ఇలాంటి పరిస్థితులలో పాఠకులు తప్పక తికమక పడతారు. ఈవిధంగా వచ్చిన తికమక సమాచారమే టీవీలలో కూడా రావటంతో... ఈ ధర్మసందేహం ఇంకా వేగంగా ప్రజలలోకి వెళ్లి, నిజానిజాలు తెలుసుకోలేని పరిస్థితి ఏర్పడుతుంది. కనుక ఖచ్చిత గణితం ప్రకారము మరియు వైజ్ఞానిక సమాచారం ప్రకారము 14వ తేది మధ్యాహ్నం 1గం.14 నిముషాలకి మకర సంక్రమణం జరుగుతుంది.

ఇక పంచాంగ పరిభాషలో చెప్పాలంటే విజయ సంవత్సర పుష్యమాసం శు. చతుర్దశి మంగళవారం 14 జనవరి 2014 ఆరుద్ర నక్షత్ర ఇంద్ర యోగ, గరజికరణ నవమ ముహూర్త మేషలగ్న సమయం మద్యాహ్నం 1గం. 13నిముషములకు ఉత్తరాషాడ నక్షత్ర 2వ పాదమైన మకరరాశి లోనికి సూర్య ప్రవేశంచే ఉత్తరాయణ పుణ్యకాలం ప్రారంభమగును. కనుక జనవరి 14 మంగళవారం మకరసంక్రాంతి పర్వదినం.  మకరసంక్రాంతి పుణ్య పురుషుడి పేరు మహోదరుడు. ఈ పుణ్య పురుషుడి వాహనం ఏనుగు. కనుక పితృ పితామహాది వంశవృద్ధుల తృప్తి కొరకుగా సంక్రమణ పర్వదినాన తర్పణ కార్యక్రమాలను ఆచరించేది.

Thursday, October 10, 2013

అక్టోబర్ 13నే విజయదశమి

ఈ సంవత్సరం విజయదశమి పర్వదినం అక్టోబర్ 13వ తేది ఆదివారం నాడే ఆచరించాలి. 14వ తేది ఆచరించకూడదు. దీనికి సంబంధించిన ధర్మశాస్త్ర నిర్ణయాలను పాఠకులు, పండితులు గమనించి, ఆకళింపు చేసుకుని అక్టోబర్ 13న విజయదశమిని ఆచరించండి.
 
దినద్వయే అపరాహ్ణవ్యాపిత్యే శ్రవణర్క్షం యోగే పూర్వాకార్యా
యదా పూర్వస్మిన్ దినే అపరాహ్ణ వ్యాప్తి విశిష్ట
దశమ్యాం శ్రవణాభావః పరేద్యు ఉదయమాత్ర కాల వ్యాపినీ
దశమి శ్రవణ ర్క్షంయుతా చేత తదా పరాగ్రాహ్య - ధర్మసింధు


1. దశమి తిథి రెండు రోజులు ఉండి, రెండవరోజున అపరాహ్ణములో దశమి తిథి ఉన్నచో రెండవరోజే విజయదశమి
2. దశమి తిథి రెండు రోజులలోను అపరాహ్ణ సమయములో ఉండి శ్రవణానక్షత్రము ఉన్ననూ, లేకున్ననూ ముందురోజే విజయదశమి.
3. రెండు రోజులలో దశమి తిథి అపరాహ్ణంలో లేని యెడల, శ్రవణయోగము రెండురోజులలో ఉన్ననూ, లేకున్ననూ ముందురోజే విజయదశమి.
4. దినద్వయమందు అపరాహ్ణవ్యాప్తి ఉన్న పక్షములలో, ఏ రోజున శ్రవణయోగంతో కూడిన దశమి తిథి అపరాహ్ణంలో ఉండునో... అదే విజయదశమి.
5. ముందురోజు దశమి తిథి అపరాహ్ణ వ్యాప్తి కల్గి, రెండవ రోజు సూర్యోదయం  తదుపరి దశమి తిథికి మూడు ముహూర్తముల కాలం శ్రవణా నక్షత్రం కలిసి ఉన్నచో పరదినమే విజయదశమిని ఆచరించాలి.
 
ఇయమేవ  విజయదశమి సాచద్వితీ యదినే శ్రవణయోగా భావే పూర్వాగ్రాహ్య
దశమ్యాంతు నరైః సమ్యక్ పూజనీ యా పరాజితా ఐశానీం దిశమాశ్రిత్య అపరాహ్ణె ప్రయత్నతః - నిర్ణయసింధు


6. దశమి తిథికి రెండవరోజున శ్రవణనక్షత్ర యోగం లేకపోతే పూర్వపు రోజు గ్రహించాలి. జనులు దశమి తిథి యందు అపరాహ్ణ కాలములో ఈశాన్య దిక్కు నాశ్రయించి అపరాజితాదేవిని ప్రయత్న పూర్వకంగా పూజించాలి.
 
అశ్వినే శుక్ల పక్షేతు దశమ్యాం పూజయేన్నరః
ఏకాదశ్యాంచన కుర్వీత పూజనంచా పరాజితం
ఇతి యదాతు పూర్వ దినే శ్రవణ యోగాభావః పరదినే చాల్పాపితద్యోగినీ, తదా పరైవ తధా చ - నిర్ణయసింధు
   

7. ఆశ్వీజ శుక్ల దశమి తిధిన అపరాజితాదేవిని అర్చించాలి. ఏకాదశి నాడు అర్చించకూడదు. మొదటిరోజు శ్రవణం లేక, పరదినమందు కొద్దిగా శ్రవణ యోగం ఉన్నప్పుడు పరదినమే విజయదశమిని ఆచరించాలి.
 
అపరాహ్ణె పరదినే అపరాహ్ణె శ్రవణాభావేతు  సర్వ పక్షేషు పూర్వైవ - నిర్ణయసింధు 

8. శ్రవణా నక్షత్ర యోగంతో కూడిన అపరాహ్ణ వ్యాప్తి కల్గినదే విజయదశమి. రెండవ రోజు అపరాహ్ణకాలములో శ్రవణ యోగంలేనిచో ముందురోజే అన్నీ రకములుగా విజయదశమిని ఆచరించాలి. ఈ ఎనిమిదవ పాయింట్ ప్రకారం శ్రీ విజయలో విజయదశమి నిర్ణయానికి వర్తిస్తుంది.

దృగ్గణితరీత్యా 13 ఆదివారం దశమి తిధి మధ్యాహ్నం 1గం. 18ని. లకు ప్రారంభమై 14 మధ్యాహ్నం 11గం.16ని.లకు వెళ్ళిపోతున్నది. శ్రవణా నక్షత్రము 13 ఉదయం 6 గం.22ని.లకు ప్రారంభమై 14 సూర్యోదయం లోపలే 5గం.01ని.నకు శ్రవణం వెళుతుంది. 13 ఆదివారం దశమి మరియు శ్రవణా నక్షత్రమునకు అపరాహ్ణవ్యాప్తి కలదు. 14న శ్రవణా నక్షత్రం లేదు. పైన ఉదహరించిన ధర్మసిందు, నిర్ణయసింధు వంటి ప్రామాణిక ధర్మశాస్త్రాల నిర్ణయానుసారం ఇచ్చిన 8 పాయింట్లలో చివరి పాయింట్ ప్రకారం దృగ్గనితరీత్యా 13 అక్టోబర్ విజయదశమిని జరుపుకోవాలి. 14వ తేది సోమవారం విజయదశమి జరుపుకొనుటకు శాస్త్ర విరుద్ధము.

దైవజ్ఞ పొన్నలూరి శ్రీనివాస గార్గేయ మరియు చిరంజీవి నందిని గార్గేయ గార్లచే రచింపబడిన శ్రీ  విజయ నామ సంవత్సర కాలచక్ర పంచాంగం 25, 26 పేజీల నుంచి గ్రహింపబడినది.